Bugun, 24-may kuni Axborot texnologiyalari va kommunikatsiyalarini rivojlantirish vaziri Sh. Shermatov Elektron hukumat loyihalarini boshqarish markazining Elektron hukumat tizimlarini rivojlantirish maqsadida Ma’lumotlarni saqlash va qayta ishlash markazining qurilayotgan obyekti holati bilan tanishdi.

Vazirlar Mahkamasining Elektron hukumat tizimining Ma’lumotlarni saqlash va qayta ishlash yagona markazini tashkil qilish bo‘yicha tegishli qaroriga asosan “Elektron hukumat loyihalarini boshqarish markazi” davlat muassasasi tomonidan Ma’lumotlarni saqlash va qayta ishlash markazini qurish ishlari amalga oshirilmoqda.

Loyiha doirasida 300 ta telekommunikatsiya shkaflari, 580 ta serverlar, 20 PB ma’lumotlarni saqlash tizimi va uzluksiz elektr ta’minotini ta’minlash uchun zaxiralangan aloqa liniyalari va elektr tarmoqlari, shuningdek dizel generatorlar bilan ta’minlanishi nazarda tutilgan. Ma’lumotlarni saqlash va qayta ishlash markazining ishonchliligi Uptime Institutening «Tier III» talablariga asosan loyihalashtirilgan.

Loyiha ishga ishga tushirilgandan so‘ng markazda vazirliklar va davlat tashkilotlariga tegishli asosiy va zaxira axborot resurslari va tizimlari joylashtirilishi rejalashtirilgan.

AKT vaziri Sh. Shermatov Elektron hukumat loyihalarini boshqarish markazi faoliyati va xodimlar uchun yaratilayotgan sharoitlar, amalga oshirilgan ishlar bilan tanishib, uni zamon talablariga mos tarzda bitkazish bo‘yicha o‘z takliflarini aytib, vazifalarni belgilab berdi.