Bugun 6-fevral kuni Jizzax shahridagi 8-son maktabi negizida informatika va axborot texnologiyalarini chuqurlashtirib o‘qitishga ixtisoslashtirilgan tayanch maktabning ochilish marosimi bo‘lib o’tdi.

Maktabning ochilish marosimida Axborot texnologiyalari va kommunikatsiyalarini rivojlantirish vazirining o‘rinbosari Q. Yuldashev, Jizzax viloyat hokimi E.Saliev, Xalq ta’lim vazir o’rinbosari R.Karimjonov, “Unitel” MCHJ Davlat organlari bilan hamkorlik bo'yicha direktor S. Muhamedaliyev, viloyatdagi ma’sul rahbar va xodimlar hamda mahalliy yoshlar ishtirok etishdi.

Maktab Beeline Uzbekistan tomonidan 700 mln. so'mga kapital ta'mirlanib, zamonaviy informatika va robototexnika, kibersport, matematika, ingliz tili xonalari, hamda raqamli kutubxona va konferensiya zallari tashkil qilindi. Xonalar zamonaviy kompyuter texnikalari va interaktiv sensorli doskalar bilan jihozlandi.

Ilm maskanidagi bu kabi imkoniyatlar ixtisoslashtirilgan maktabning samarali faoliyat yuritishida, o‘quvchilarning axborot-kommunikatsiya texnologiyalari va dasturlash yo‘nalishida ham o‘z bilim va iqtidorlarini namoyish etishlarida muhim omil bo‘lib xizmat qilishi, shubhasiz.

Tantanada “Bir million dasturchi” yirik loyihasi doirasida Top-100 talikka kirgan o‘qituvchilarni,  Nanodegree granti sohiblari va ixtisoslashtirilgan maktabga kirish imtihonida eng yuqori ball to'plagan o'quvchilarni taqdirlash marosimi ham bo‘lib o‘tdi.