Prezident tomonidan ilgari surilgan beshta muhim tashabbusning uchinchisi doirasida Axborot texnologiyalari va kommunikatsiyalarini rivojlantirish vazirligi tomonidan mamlakatimizning barcha hududlarida aholi va yoshlar uchun Raqamli texnologiyalar o‘quv markazlari tashkil etilmoqda.

Yoshlarning ijodiy-intellektual salohiyatini ro‘yobga chiqarish uchun sharoitlar yaratish, ularni kompyuter texnologiyalari, dasturlash asoslari va robototexnika, kompyuter o‘yinlari va kibersportni yoshlar o‘rtasida yanada ommalashtirish, bu sohada mutaxassislarni tayyorlash tizimini takomillashtirish maqsadida, Farg‘ona shahrida Raqamli texnologiyalar o‘quv markazi ochilish marosimi bo‘lib o‘tdi.

Ochilish marosimida Axborot texnologiyalari va kommunikasiyalarini rivojlantirish vazirligi Farg‘ona viloyati hududiy boshqarmasi, Farg‘ona viloyati va Farg‘ona shahri hokimliklari, Vazirlik tizimidagi korxona va tashkilotlar rahbar va xodimlari, shuningdek keng jamoatchilik vakillari hamda o‘quvchi yoshlar ishtirok etdilar.

O‘quv markazida yoshlarga axborot texnologiyalari, dasturlash asoslari, robototexnika, kompyuter o‘yinlari va kibersport, zamonaviy raqamli texnologiyalarni o‘rgatish hamda mutaxassislarni tayyorlash ko‘zda tutilgan.