O‘zbekiston Respublikasi Prezidenti Shavkat Mirziyoyevning 2020 yil, 29 dekabrda Oliy Majlis va O‘zbekiston halqiga yo‘llagan murojaatnomasida 2021 yilning oxiriga qadar elektron davlat xizmatlarini 60 taga ko‘paytirib, ularni 300 taga, masofaviy xizmatlar ulushini esa kamida 60 foizga yetkazish zarurligi ta’kidlangandi.
Shundan kelib chiqib hamda O‘zbekiston Respublikasi Prezidentining «Raqamli O‘zbekiston – 2030» strategiyasini tasdiqlash va uni samarali amalga oshirish chora-tadbirlari to‘g‘risida»gi Farmoniga muvofiq, «2021 yilda davlat xizmatlarini ustuvor ravishda elektron shaklga o‘tkazish bo‘yicha chora-tadbirlar dasturi» taqdim etildi.
O‘zbekiston Respublikasi Axborot texnologiyalari va kommunikatsiyalarini rivojlantirish vazirligi tomonidan tayyorlangan mazkur loyihada 2021 yilda talabgorligi yuqori bo‘lgan 60 ta davlat xizmatini Yagona interaktiv davlat xizmatlari portalida (my.gov.uz) joriy qilish ko‘zda tutilgan.
Mazkur topshiriqni amalga oshirish maqsadida AKT vazirligi tomonidan mavjud davlat xizmatlari tahlil qilinib, 2021 yilda YaIDXP orqali davlat xizmatlarini ustuvor ravishda elektron shaklga o‘tkazish bo‘yicha chora-tadbirlar dasturi loyihasi ishlab chiqildi.
Mazkur dastur loyihasi bilan davlat boshqaruvi organlari, vazirlik va idoralar tomonidan ananaviy tarzda yoki boshqa manbalar orqali elektron ko‘rsatilayotgan talabgorligi yuqori bo‘lgan davlat xizmatlarini Yagona interaktiv davlat xizmatlari portali orqali ko‘rsatishni yo‘lga qo‘yish belgilangan.
Aynan qanday xizmatlar?
Ushbu dastur bilan davlat xizmatlarini to‘liq masofadan ko‘rsatish bo‘yicha jarayonlarni avtomatlashtirish va xizmat ko‘rsatish bosqichlarin maksimal darajada optimallashtirish nazarda tutilmoqda.
Loyiha jamoatchilik va mutaxassislar muhokamasiga qo‘yilgan bo‘lib, unda barcha istovchilar taqdim etilishi ko‘zda tutilayotgan 60 ta davlat xizmati bo‘yicha o‘z taklif va mulohazalarini bildirishlari mumkin.
Siz 2021 yilda qaysi davlat xizmatlari elektron shaklga o‘tkazilishini xohlar edingiz? Ushbu havolaga o‘ting va o‘z takliflaringizni bildiring: https://regulation.gov.uz/uz/d/28609